Gjuha Shqype.., Gjergj Fishta

gjergj fishta gjuha shqype
Porsi kanga e zogut t'veres,
Qi vallzon n'blerim të Prillit;
Porsi i amli flladi i eres,
Qi lmnon gjít e drandofillit:
Porsi vala e bregut t'detit,
Porsi gjâma e rrfés zhgjetare,
Porsi ushtima e nji termetit,
Njashtû â gjûha e jonë shqyptare.

Ah! po, â amel fiala e sajë,
Porsi gjumi m'nji kerthí,
Porsi drita plot uzdajë,
Porsi gazi i pá mashtrí;
Edhè ndihet tue kumue,
Porsi fleta e Kerubimit,
Ka'i bjen qiellvet t'u fluturue
N't'zjartat valle t'ameshimit.

Prá, mallkue njaj bir Shqyptari,
Qi ket gjûhë të Perendís,
Trashigim, qi na la i Pari,
Trashigim s'i a lên ai fmís;
Edhè atij i u thaftë, po, goja,
Qi e perbuzë ket gjûhë hynore;
Qi n'gjûhë t'huej, kúr s'âsht nevoja,
Flet e t'veten lên mas dore.

Në gjûhë shqype nânat t'ona
Shì prej djepit na kan thânun,
Se âsht nji Zot, qi do t'a dona:
Njat, qi jetën na ká dhânun;
Edhè shqyp na thán se Zoti
Per Shqyptarë Shqypnín e fali,
Se sá t'ênden stina e moti,
Do t'a gzojn kta djalë mbas djali.

Shqyp na vetë, po pikë mâ para,
N'agim t'jetës kúr kemi shkue
Tue ndjekë flutra neper ara,
Shqyp mâ s'pari kemi kndue:
Kemi kndue, po, armët besnike,
Qi flakue kan n'dorë t'Shqyptarvet,
Kah kan dekë per besë jetike
Kah kan dekë kta per dhé t't'Parvet.

Në ketë gjûhë edhè njaj Leka,
Qi 'i rruzllim mbretnín s'i a xûni,
Qi kah bijte aj, shkelte deka,
Shekllit mbarë ligjë t'randë i vûni;
Në ket gjûhë edhè Kastriota
U pat folë njatyne ushtríve,
Qi sa t'ndrisë e diellit rrota,
Kan me kênë ndera e trimníve.

Prá, Shqyptarë, çdo fés qi t'jini,
Gegë e Toskë, malcí e qyteta,
Gjûhen t'uej hurr mos t'a lini,
Mos t'a lini sá t'jetë jeta,
Por per tê gjithmonë pûnoni;
Pse, sa t'mbani gjûhen t'uej,
Fisi i juej, vendi e zakoni
Kanë me u mbajtë larg kâmbet t'huej.

Nper gjuhë shqype bota mbarë
Ká me u njohtë se ç'fis ju kini
Ká me u njohtë jú per Shqyptarë:
Trima n'zâ sikurse jini.
Prandej, prá, n'e doni fisin,
Mali, bregu edhè Malcija
Prej njaj goje sod t'brohrisin:
Me gjuhë t'vet: rrënoftë Shqypnija!

COMMENTS