Histori shkodrane (1913)

shkoder shkodra foto
N' Shkodër pûnët si 'i herë 'i herë: rrêna, plûhen a baltë, kual e katana, muzikë, peca e .... "Rrnoftë Shqypnia!" - sá t' duesh; por pûnë pá t' cillat s' ká si rrnon Shqypnia, pak e aspak. Gjindja jânë ndêjë hijeve pá pûnë, tuj pritë me gojë hapët, si zogj pllûmash, palè se shka pa u bjen nana-vida Europë; por .... per nji herë .... prit, Zot, veç mîzat; pse, (me ç' andrra po shifen), vonë e vonë do t' u bîn gjâ m' skep. E prá atdhetarët e shkretë plasen, plasen, u shkyen germâzash, tuj folë per Shqypnië e tuj pûnue për vedi; por ç' dobië! Për Shqypnië s' po ká pûnë e per atdhetarë s' po ká pare.

Pazari i Shkodres âsht bâ taman "Club" me pí kafe e me çá llafe .... politiket. Oh, po! per politikë mos pvet! Ktû politikë sá t' duesh. Pá pasë xânë gjâ politike, ç' do kopuk do me dalë Bismark: pá ja pasë ndî êmnin strategiës, ç' do kulifickan i keq, bâ prejë lingatet mos me u gjetë qên qi me e hanger, flet, morè djalë, per pûnë luftet si me kênë nji Velington, nji Napoleon, nji Moltke, Tegetof a Togo, shî me t'a bâ kryet per voe. Por, elè, me t' qitë rreziku me ndêjë me ndonji asish, qi ká pâ anderr se âsht i dijshem, prejsè, kûr pat kênë n' shkollë, ká pasë shkye ndoj kartelë a thye ndoj tabelë, atëherë, po, se nuk i din mâje vedit, kaq dijen e filozofiën e politiken e madhe qi pshtýn prejë gojet. T'a dán shekllin fele - fele, si me kênë tujë dá nji sherqî Stajket; i ngatrron e i shkatrron Krajlat shoq me shoq, me t' vojtë mêndja se atëherë po kersèt lufta e po bâhet nâmi; por, kúr fûndi, veç n' i krisët zorra n' bark atí prejë s' thatit, se kerkush s' lot vêndit.

E tu kênë qi ktû rregullohet politika jo mas interesesh s' vêndit, por mas leverdiës t' setcillit, ç' do pûnë qi ndollë, kaq dredhet e e shperdredhet, e shtohet e voglohet e zbukurohet, sá mos me mûjtë mâ me dijtë se shka âsht rrênë, se shka âsht e vertetë.

Prandaj ksajë herë s' po vêm lajme Shkodret; pse druem se vêhna n' rrezik me thânë ndoj rrênë: shka kishte me kênë kundra amtyrës s' Perkohshmes s' onë.

Hylli i Dritës, 1913

COMMENTS