Vitore Nino

vitore nino ujka aktore
Vitore Nino (Ujka, mbiemri vajzërisë) lindi në vitin 1924 në qytetin e Shkodrës. Pasi mbaron Institutin Pedagogjik fillon punë si mësuese në Tiranë dhe në Kosovë ku jepte gjuhën shqipe. Por dashuria e saj e madhe ishte teatri. Kështu ajo do të përfshihet në grupet amatore të qytetit të Shkodrës ku edhe regjisori Artisti i Popullit, Andrea Skanjeti do ta përzgjedhë në vitin 1946, për pjesën "Portreti".

Në vitin 1949, Teatri diletant pranë Shtëpisë së Kulturës ku ajo merr pjesë do të bëhet bërthama e Teatrit profesionist "Migjeni". Vitore Nino së bashku me Ida Krajën, Çezarina Çiftën dhe Aneta Nikajn janë femrat e para që morëm pjesë në teatrin profesionist të Shkodrës.

Të shumta kanë qenë rolet e saj në teatër, këtu mund të përmendim rolin e Lokes tek drama "Tokë jonë" e Kolë Jakovës, rolin e Soses tek drama "Fisheku në pajë", rolin e Nënë Bjeshkës tek drama "Baca i Gjetajve" etj.

Në kinematografi interpretimi i saj i parë do të jetë në filmin "Komisari i Dritës" më tej do të vazhdonin rreth 20 role të tjera. Do të bëhej shumë e njohur për publikun me rolin e Hallës në filmin "Çifti i lumtur". Roli i saj më i fundit do të jetë, roli i Gjyshes, në filmin televiziv "Rikonstruksioni" në vitin 1989. Pas vitit 1990 do të shpërngulet në Tiranë.

Vitorja u nda nga jeta në vitin 2007. Ajo mbetet e paharruar modele e artit skenik.

Për meritat e saj të larta Vitore Nino është vlerësuar më titullin "Artiste e Merituar".

Kinematografi: Balada e Kurbinit, Rikonstruksioni, Dasma e shtyrë, Dora e ngrohtë, Qortimet e vjeshtës, Ditët që sollën pranverën, Çifti i lumtur, Komisari i Dritës, etj.

Teatër: Baca i Gjetajve, Çifti i lumtur, Cuca e maleve, Përkolgjinajt, Nora, Votra e huaj, Përmbysja, Ishulli i paqes, Ata që nuk shfaqen, Çështja ruse, Portreti, etj.

COMMENTS